Unha das illas con bancos e xardineiras instaladas na rúa Antero Rubín, co antigo convento de Santo Domingo ao fondo.
29.5.2024
Civis Global realiza as obras de reforma urbana na rúa Antero Rubín de Tui, completando unha transformación que pon de relevo o carácter patrimonial desta vía pola que circulan os peregrinos do Camiño de Santiago que veñen de Portugal.
Nesta execución para o Concello de Tui, ao través do programa REACPON da Deputación de Pontevedra, realizouse un meticuloso traballo de remodelación e reacondicionamento para reutilizar o revestimento orixinal en pedra da rúa e adaptar todas as infraestruturas de servizos.
A reforma converte o tramo de 300 metros comprendido entre as rúas Bispo Lago e Canónigo Valiño nunha vía con prioridade para o uso peonil, que discorre nunha plataforma única e cun deseño que se integra na contorna patrimonial.
Todo o firme sobre base de formigón ten agora un acabado con árido visto, en canto rodado, que delimita e contrasta coa pedra para a zona de peóns. Ademais nunha parte do percorrido recupérase a pedra dunha antiga condución para darlle un remate en pedra vella e poñer en valor este tramo do casco do século XIX.
Apórtase tamén unha mellora de servizos coa incorporación de mobiliario urbano e axardinamentos específicos. O mobiliario urbano empregado consta dunha serie de illas en diferentes formatos, con bancos en madeira e pedra, realizados in situ, e unhas xardineiras verticais en aceiro galvanizado, con prantación de vides e arborado. O conxunto, realizado porlo estudo Areeira Arquitectos, serve para crear zonas de descanso e marca os límites para a zona de tráfico.
Con esta obra de reforma urbana renóvanse todas as infraestruturas de servizos públicos de alumeado e as conducións de auga para abastecemento, saneamento e pluviais.
Un alumeado a base de luces led en farois e luminarias de fachada completa a actuación cun deseño axeitado a esta zona de protección patrimonial.
Civis Global é unha empresa construtora con ampla experiencia en reforma urbana, con actuacións recentes como a remodelación da Porta do Sol en Vigo ou a rúa da Igrexa en pleno casco histórico de Ferrol.
