O carril-bici creado na Estrada Baixa do Porto en Ferrol, entre a zona centro e A Malata.
12.9.2024
A reforma urbana da Estrada Baixa en Ferrol é unha remodelación da infraestrutura viaria existente para reordenar e equilibrar os distintos tráficos de vehículos, bicicletas e peóns que conflúen na zona.
A actuación logra mellorar a seguridade viaria mediante a creación dun carril-bici de 750 metros, entre o paseo de A Malata e o núcleo urbano de Ferrol, e dota de accesibilidade total a esta zona.
Co proxecto conséguese ademais un espazo público que contribúe á implantación dun modelo de mobilidade sostible que xera novas áreas de relación e convivencia na cidade.
Os traballos previos consistiron no retranqueo e renovación do peche perimetral do Porto e tamén do muro do Baluarte para dar unha maior sección á plataforma.
A reordenación realizada permite gañar unha superficie de 1800 m2 para peóns e ciclistas, con 19 novas prazas de aparcamento para vehículos.
Ademais, con 3.900 m2 de superficie axardinada e o alumeado ornamental con proxectores lineais integrados no carril-bici, a reforma crea unha contorna de equilibrio, integrando estética e paisaxe na zona de contacto entre as infraestruturas portuarias e a trama urbana.
