Civis Global, exemplo de modernización para o programa Re-acciona

CIVISGLOBAL. OFICINAS.
CIVISGLOBAL. OFICINAS.

Oficinas centrais de Civis Global, en Vigo.

16.05.2017

A construtora galega Civis Global desenvolve desde 2014 un programa de modernización destinado ao área de Proxectos e Licitacións que lle permitiu mellorar o resultado no caso do acceso á obra pública.

A experiencia de Civis Global foi presentada como un caso de éxito na posta en marcha dos plans de innovación na Xornada sectorial Re-acciona TIC: novos retos no sector da construción, que tivo lugar o 16 de maio en Santiago. O acto reuniu directivos e responsables de departamentos de empresas vinculadas ao sector para asistir a unha serie de ponencias especializadas. A xornada serviu de presentación da segunda fase da iniciativa Re-acciona TIC do Igape para o fomento da economía dixital.

Como explicou Sarai Aguirre, xefa de Produción de Civis Global, “o impulso de renovación e reorientación da actividade da empresa cara o campo privado incluíu a incorporación de procesos dixitalizados en moitos campos de actividade, desde o uso de software BIM de información simultánea e en 3D de todos os aspectos materiais da construción, ata creación de webs colaborativas para compartir información entre equipos”.

Desde a crise da construción a compañía construtora está enfocada ao sector industrial e de edificación privadas, pero mantén o seu esforzo destinado a concursos de obras públicas que decidiu modernizar. A mellora do sistema para licitación pública contou co asesoramento externo a través do programa Re-acciona. Un equipo de traballo analizou durante seis meses o sistema mediante visitas e reunións cos profesionais implicados. Tras o correspondente diagnóstico establecéronse unha serie de protocolos que finalmente melloraron o éxito dos proxectos presentados para licitación pública baseándose nun proceso máis selectivo.

Civis Global é unha empresa construtora que no sector industrial privado leva feito nos últimos anos máis de 150.000 metros cadrados de instalacións (naves, edificios de oficinas, plantas pesqueiras) e tamén edificios empresariais (sede CITIC-CENSA, Centro de Iniciativas Empresariais de Porto de Molle ou a sede da Fundación Real Club Celta).

Resumo en vídeo