Civis Global instala a xeotermia no parque industrial de O Porriño

Traballos de perforación dos pozos para captación de enerxía do subsolo no Polígono de A Granxa..

7.06.2017

A construtora galega Civis Global desenvolve as obras para dotar de enerxía xeotérmica ás edificacións da sede central do polígono empresarial de A Granxa, en O Porriño, pertencente a Zona Franca de Vigo.

O proxecto final dotará aos edificios dunha potencia instalada de 270 kW, o que a converte na instalación máis importante neste momento en Galicia, onde a media de instalacións en empresas e edificios administrativos é duns 125 kW.

A xeotermia é unha enerxía limpa e renovable procedente das condicións térmicas do propio subsolo. A captación da enerxía faise a traveso de 24 pozos de máis de 140 metros de profundidade e distribúese mediante unha rede de condución de 3,4 kilómetros.

O sistema permite transformar a calor do subsolo para obter calefacción ou refrixeración e conducilo mediante un fluído (glicol). A instalación consta de tres bombas de calor para alimentar un circuíto de 53 terminais ou fancoils que distribúen a calor ou o frío nas instalacións.

Civis Global construíu xa a maior instalación xeotérmica en Galicia no Centro de iniciativas empresariais do polígono industrial de Porto de Molle, en Nigrán. Daquela, a rede instalada era de case 4 kilómetros de conducións nun edificio que polos aspectos ambientais e o seu carácter sostible mereceu a certificación Breeam que só posúen 320 edificios en toda España.