Fachada principal da nave multiusos construída para PSA Peugeot-Citroën, en Zona Franca Balaídos.
09.11.2016
A Zona Franca de Vigo e PSA Peugeot Citroën inauguraron hoxe a maior instalación industrial construída integralmente por Civis Global na área industrial de Balaídos (Vigo). Trátase dunha nave multiusos para loxística e estacionamento de vehículos de 42.000 metros cadrados (denominada Nave H de Balaídos) e que foi realizada pola nosa compañía nun prazo de 12 meses.
O proxecto, desenvolto na superficie de 15.000 m2 dispoñible, dispón de tres plantas con dous usos diferenciados: unha zona de loxística e dúas plantas de aparcadoiro con capacidade para 1.242 prazas, entre coches e motos.
Civis Global empregou solucións de última xeración en deseño, seguridade e enxeñería, incluíndo a instalación de 29 enormes cerchas, de 60 metros de longo e entre 40 Tm e 60 Tm de peso cada unha. A nova nave é ecoeficiente, tanto polos materiais empregados como polo sistema de placas solares de autoabastecemento enerxético. O acabado da fachada combina materiais duros, como formigón ou recubrimentos, e xardíns verticais, para funcionar como espazo de transición entre a zona urbana e deportiva (está fronte ao estadio de fútbol de Balaídos) e o polígono industrial do automóbil.
Civis Global está a potenciar a súa división de obras industriais, onde tamén constrúe unha gran planta de compoñentes do automóbil para o grupo Antolín en Portugal e ten desenvolto recentemente instalacións empresariais para Citic Censa, industrias químicas e plantas pesqueiras.
