Civis Global aposta pola conservación do patrimonio urbano

Fachada do edificio Solvia, na rúa Pi i Margall de Vigo.

07.11.2016

Civis Global acaba de concluír a construción e rehabilitación dun edificio de vivendas, garaxes e área comercial no centro de Vigo (R/ Pí y Margall 31-35). A nosa compañía volveu constatar a súa calidade construtiva nunha obra  cuxa fachada está catalogada como elemento patrimonial a conservar.

A construción e rehabilitación realizouse nun prazo de poucos meses, adaptando os materiais de carpintería e forxa en galerías e balcóns para respectar o deseño histórico orixinal. A rúa Pi i Margall de Vigo conta agora no seu arranque cun novo elemento de continuidade coa tipoloxía existente neste entorno, a un paso dun área tan emblemática como o Paseo de Alfonso XII.

Trátase  dun edificio de 16 vivendas, trasteiros, dúas plantas de garaxe subterráneas e dous locais comerciais, cun volume total de 8.000 m2. O propietario actual é a compañía inmobiliaria Solvia do Banco Sabadell, que rescatou a edificación para a súa posta no mercado.

Civis Global ten relanzado a súa división de construción civil, tanto para a construción de edificios como para reformas de vivendas ou habilitacións de locais comerciais e oficinas. En Vigo, por exemplo, ten na fase de inicio un novo edificio de vivendas na rúa Alfonso XIII así como a rehabilitación e mellora dun edificio histórico na rúa Concepción Arenal (fronte ao edificio de Aduanas).