Civis Global mellora catro colexios públicos en Galicia

escola-infantil-betanzos
escola-infantil-betanzos

Civis Global ten construído en Galicia centros educativos como esta galescola de Betanzos (A Coruña).

11.1.2017

A empresa Civis Global acaba de rematar as obras de acondicionamento do antigo pavillón deportivo do colexio público de infantil e primaria (CEIP) de Rubiáns en Vilagarcía de Arousa (Pontevedra), un traballo de rehabilitación que permite que os escolares poidan utilizar o recinto que presentaba deficiencias en épocas de chuvia.

A construtora galega ten realizado nos últimos meses un conxunto de obras para centros de ensino, contratadas pola Consellería de Educación da Xunta de Galicia.

No caso do colexio de Rubiáns as obras de reforma do aula-ximnasio de educación física consistiron no acondicionamento interior e exterior do recinto para mellorar a estanquidade e o illamento térmico de muros e chan, ademais da substitución da cuberta. Por outro lado engadíronse uns aseos anexos para uso específico do ximnasio.
Unhas obras que supuxeron unha notable mellora das instalacións, como pode verse reflectido nas novas de prensa.

Outros colexios mellorados

Outra das obras realizadas por Civis Global na provincia foi a reconstrución das instalacións do aula-taller do instituto de ensino secundario (IES) Pedra da Auga, en Ponteareas, que resultaran incendiadas a finais de 2015. A reforma permitiu que os rapaces puideran iniciar o curso con normalidade o pasado mes de setembro.

A compañía construtora realizou tamén en 2016 outras obras menores en centros escolares, como reforma da cuberta do instituto República Oriental do Uruguai en Vigo e o cambio da cuberta da pista polideportiva no colexio As Solanas-Nicolás Gutiérrez Campo en A Guarda.