Civis Global, na última fase da construción do Porto Seco

Imaxe aérea das obras de urbanización que a construtora galega dirixe e constrúe na Plisan Salvaterra-As Neves.

7.03.2017

A primeira fase das obras de urbanización da Plataforma Loxística e Industrial de Salvaterra-As Neves (PLISAN), dirixidas pola construtora galega Civis Global, entra na súa última fase. A construción de viais, dotación de servizos, preparación e explanación de 120.000 metros cadrados de superficie do denominado Porto Seco de Vigo rematará, cumprindo os 18 meses de prazo previstos. As obras foron adxudicadas en setembro de 2015, a unha Unión Temporal de Empresas (UTE) de tres empresas, baixo a dirección de Civis Global.

A construción e dotación dos sistemas xerais para dar servizo ás parcelas incluídas no centro loxístico deixará preparada a plataforma loxística para o seu uso empresarial. A actuación que Civis Global ten en marcha abrangue unha superficie de 120.000 metros cadrados.

O parque empresarial queda tamén directamente enlazado coa autovía Vigo-Porto, coas autoestradas galegas e portuguesas e coa autovía a Madrid. O Porto Seco permitirá poner no mercado solo empresarial de primeira calidade para atraer industria e emprego.

As obras realizadas implican un enorme movemento de terras para escavación (135.000 m³) e terrapléns e recheos (125.000 m³). Ata o momento se levan empregado 30.000 toneladas de material para aglomerado dos máis de 4,5 quilómetros de viais, con dous carrís por sentido, mediana de 9 metros e 8 glorietas de 48 metros de diámetro.

O proxecto de urbanización inclúe tamén a instalación de toda a rede de abastecemento e condución de augas, liñas de enerxía eléctrica e gas e outros servizos dotacionais básicos para o Porto Seco.