Civis Global constrúe a nova factoría de Ecoforest en Porto de Molle

Infografía do proxecto da planta industrial que Civis Global constrúe para Ecoforest en Porto de Molle (Nigrán).

3.08.2017

A empresa construtora galega Civis Global construirá a nova sede da empresa galega Ecoforest Geotermia S.L., compañía líder en sistemas e equipos de xeotermia e climatización sustentable en Galicia.

A instalación industrial estará situada no polígono industrial de Porto de Molle en Nigrán (Pontevedra) e constará dunha nave de 10 metros de altura cun edificio de oficinas de tres plantas e soto.

A nave destacará polo acabado, que combina o uso de fachada ventilada en composite cun muro cortina con ventás. O conxunto terá unha superficie duns 14.000 metros cadrados dos que case 9.000 metros corresponden á zona de produción.

Civis Global ten desenvolvido xa en Porto do Molle o edificio do Centro de iniciativas empresariais, unha construción dotada de instalacións de climatización con xeotermia, que mereceu a certificación Breeam que só posúen 320 edificios en toda España. Recentemente ten rematado tamén a instalación do sistema de xeotermia no edificio da sede central do polígono industrial de A Granxa en O Porriño (Pontevedra) para a Zona Franca de Vigo.