Civis Global distinguida como construtora medioambiental

7.12.2016

Civis Global foi distinguida no 2016 pola Asociación de Promotores Inmobiliarios de Pontevedra (Aproín) por realizar a mellor obra dotacional, integrada na paisaxe e na contorna urbana pola construción das instalacións do centro polideportivo Máis que Auga Navia (Vigo).

A empresa ten recoñecido prestixio polas súas actuacións de calidade, ecoeficiencia e respecto nas súas recentes construcións, entre as que destacan a estrada e paseo de acceso ao faro de Ortegal (na imaxe), en Cariño (A Coruña), o paseo fluvial do río Cabe en Monforte de Lemos (Lugo), a recuperación do sistema dunar da Costa da Vela (Ría de Vigo) ou a recente construción do sistema de abastecemento de augas en A Lama (Pontevedra).

Fora de España a empresa ten sido expresamente felicitada polo seu traballo medioambiental de posta en valor do acceso á Meseta de Marcahuasi (Perú) e a rehabilitación do Museo de Arte de Lima (Perú), con senllos recoñecementos públicos do Goberno peruano.

Civis Global ven de rematar outra importante obra de integración coa construción do maior xardín vertical nunha instalación industrial en Europa, con 1.350 metros cadrados plantados nas fachadas da nave multiusos inaugurada en novembro de 2016 polo Consorcio da Zona Franca de Vigo e PSA Peugeot Citroën. Civis Global construíu unha instalación de 42.000 metros cadrados e 18 millóns de euros de presuposto, dotada de paneis solares e outras medidas medioambientais.

A compañía dispón da acreditación de xestión ambiental de acordo á norma UNE-EN ISO 14001, que sistematiza o control dos aspectos ambientais (xestión de recursos, reducción do impacto ambiental) en todas as súas actividades.