Civis Global inaugura a súa primeira rotonda informativa

A fonte central da rotonda, o día da súa inauguración na rúa Rosalía de Castro en Vigo.

10.07.2017

As obras de mellora urbana que realiza Civis Global no último tramo da ría Rosalía de Castro en Vigo, incorporan unha novidade tecnolóxica pouco habitual: unha xigantesca pantalla led circular de case 2 metros de alto, cunha superficie total de 24 metros cadrados.

O dispositivo de control instalado na rotonda permite a xestión online de todos os seus aspectos de funcionamento. Ademais conta cunha sonda que permite que a pantalla adapte a súa intensidade lumínica ás condicións de luz ambiente. Ao tratarse dun sistema versátil pode incorporar calquera tipo de contido visual, texto, imaxes ou vídeo, ben sexa de información práctica de tráfico ou de carácter institucional.

Coa instalación desta rotonda Civis Global culmina a rehabilitación desta zona emblemática da cidade. A actuación na zona mellora todos os servizos urbanos nun tramo duns 150 metros de lonxitude, entre as rúas transversais de Canceleiro e Serafín Avendaño, incluído un tramo duns 85 metros nesta última transversal.

No aspecto estético e ambiental, xardineiras e renovación de arborado (camelios e alheñas) dan un novo aspecto á zona que mellora tamén as súas condicións de abastecemento e saneamento, telecomunicacións e conducións eléctricas. Os faroles de tipo isabelino, con luminarias de baixo consumo e máis potentes, completan a actuación.

A rúa Rosalía de Castro é unha das zonas máis transitadas de Vigo, centro residencial e de servizos de ocio e hostalería destacado na cidade.