Nova sede do Celta de Vigo, Civis Global volve probar a súa calidade

A fachada en obras do edificio que será a sede oficial para o Celta de Vigo, na rúa do Príncipe.

20.07.2016

Civis Global volve testar a súa calidade e rapidez construtiva nors traballos de rehabilitación e reconversión integral no antigo edificio do Mercantil de Vigo, que a partires do vindeiro ano será a nova sede social do Real Club Celta de Vigo. Como xa fixera coa rehabilitación do Museo de Arte de Lima, co Centro de Interpretación de Toralla e outras obras, Civis Global demostra a súa calidade profesional en edificios de gran valor arquitectónico e patrimonial, polos que xa recibiu felicitacións públicas.

A sede do club Celta de Vigo, na rúa do Príncipe, estará rematada cun espectacular elemento tridimensional a modo de cúpula, moi visible desde todos os ángulos deste transitado paseo.

En primavera de 2016 Civis Global emprendeu a primeira fase de demolición interna do antigo inmoble do Círculo Mercantil, bastante deteriorado nalgunhas zonas. Tras conseguir a adxudicación das obras de reconstrución iniciáronse os traballos para levantar a nova edificación.

As seis plantas previstas albergarán no baixo unha zona comercial e de cafetería a dobre altura, ademais dun restaurante con terraza no último andar. A conservación do antigo salón nobre do edificio, construído a principios do século XX, así como o traballo na escaleira principal de madeira son as partes máis delicadas da obra, en cuxo acondicionamento traballa persoal especializado.

Sobre esta planta nobre superpóñense en plantas sucesivas, unha residencia para os xogadores máis novos do Celta; unha policlínica para a atención dos deportistas; e unha zona de oficinas e administración nas dúas últimas plantas, albergadas baixo a cúpula ao igual que o restaurante.