Fachada do edificio de 1929 agora rehabilitado para vivendas por Civis Global.
26.3.2021
A construtora Civis Global remata unha nova obra de rehabilitación de vivendas no centro de Vigo, que dotará das últimas novidades en edificación un edificio histórico de 1929.
A construción acollerá ademais a nova sede da compañía de formación e xestión laboral Nortempo na rúa Velázquez Moreno.
O edificio consta de tres plantas e ático, ademais de planta baixa e soto, cunha superficie total de 1300 m2.
A reforma integral do inmoble consistiu na súa demolición parcial, conservando a fachada cos ocos existentes e reforzando a estrutura orixinal.
A rehabilitación mantén o nivel de protección patrimonial esixido na normativa. Consérvanse a escaleira orixinal en madeira e toda a carpintería recuperada en tarimas, portas e ventás, replicando algúns elementos deteriorados para conservar o conxunto. Ao mesmo tempo inclúense modernas dotacións e servizos, como calefacción radiante ou un ascensor de nova construción.
A fachada do edificio está decorada cunha ilustración sobre mosaico de azulexos, un elemento singular agora realzado tras os labores de limpeza.
O proxecto executouse nun período total de 8 meses, cunha loxística complexa polas actuais restricións de tráfico na zona e o escaso espazo dispoñible para provisións e outras necesidades de traballo.
Civis Global é especialista en obras de rehabilitación e ten sido distinguida pola Asociación de Promotores Inmobiliarios (APROIN) pola mellor obra neste campo de 2019. En 2018 fora premiada tamén polo traballo executado na sede da compañía Interatlantic Fish.
